अन्तिम टेस्टमा पनि इंग्ल्याण्ड विशाल अन्तरले पराजित

धर्मशाला । भारतविरुद्धको पाँचौँ र अन्तिम टेस्टमा इंग्ल्याण्ड एक इनिङ्स र ६४ रनको विशाल अन्तरले पराजित भएको छ । दोस्रो इनिङ्समा टोली मात्र १ सय ९५ रनमा समेटिएको हो ।

टोलीका लागि जो रुटले सर्वाधिक ८४ रनको योगदान दिए । उनले १२८ बलको सामना गर्दै १२ चौका हिर्काए । उनीबाहेक जोनी बेयर्स्टोले ३९ रन तथा टम हार्टलीले २० रन बनाए । ओली पोपले १९ रन र शोएब बसिरले १३ रन हिर्काए ।

इंग्ल्याण्डलाई सस्तोमा समेट्न रविचन्द्रन अश्विनले ५ विकेट लिए । उनले १४ ओभर बलिङ गर्दै ७७ रन खर्चिए । १ सयौँ टेस्ट खेलिरहेका उनले दुवै इनिङ्स गरेर ९ विकेट हात पारे त्यस्तै, जसप्रित बुमराह र कुलदीप यादवले २–२ विकेट लिए भने रवीन्द्र जडेजाले १ विकेट हात पारे ।

खेलमा पहिले ब्याटिङ गरेको इंग्ल्याण्डले पहिलो पालीमा २१८ रन बनाएको थियो । जवाफमा भारतले कप्तान रोहित शर्मा र शुभमन गिलको शतकको मद्दतले ४ सय ७७ रनको विशाल योगफल तयार गरेको थियो ।

जीतसँगै शृङ्खलामा भारत ४–१ ले विजयी बन्यो । पाँच खेलको शृङ्खलाको पहिलो टेस्टमा इंग्ल्याण्ड २८ रनले विजयी भएको थियो । दोस्रो टेस्टमा पुनरागमन गर्दै भारतले १०६ रनको जीत हासिल गर्‍यो । तेस्रो टेस्ट ४३४ रनले जितेको भारतले चौथो टेस्ट ५ विकेटले आफ्नो कब्जामा पार्न सफल भयो ।